Շիրակի մարզի և Չինաստանի Խայնան նահանգի միջև կնքվելու է համագործակցության հուշագիր
26.09.2019
Շիրակի մարզպետարանի և «Հայ-չինական հարաբերությունների տարածաշրջանային զարգացման հիմնադրամ»-ի միջև երեք ամիս առաջ կնքված համաձայնագրի շրջանակներում սեպտեմբերի 26-ին Շիրակի մարզպետ Տիգրան Պետրոսյանն ընդունեց «Հայ-չինական հարաբերությունների տարածաշրջանային զարգացման հիմնադրամի» ներկայացուցիչներին և Չինաստանից ժամանած գործարարներին։
«Հայ-չինական բարեկամությունը երկար դարերի պատմություն ունի։ Այժմ էլ մեր երկու երկրներն առանձնահատուկ կարևորում են առևտրատնտեսական կապերի խորացումն ու ընդլայնումը։ Մենք ևս պատրաստ ենք համագործակցության և ամեն ինչ կանենք մեր հնարավորությունների սահմաններում համակողմանի գործընկերության ամրապնդման ու խորացման համար։ Այդ նպատակով արդեն հիմնադրամի հետ ստորագրել ենք համագործակցության մասին հուշագիր, որի արդյունքն է նաև այս հանդիպումը»,-«Արմենպրես»-ի փոխանցմամբ՝ առանձնացնելով հիմնադրամի ակտիվ աշխատանքը՝ նշեց Տիգրան Պետրոսյանը։
«Հայ-չինական հարաբերությունների տարածաշրջանային զարգացման հիմնադրամի» գործադիր տնօրեն Վլադիմիր Սիմոնյանցի խոսքերով՝ առանձնապես ողջունելի է Շիրակի մարզպետարանի կողմից անհրաժեշտ տեղեկատվության ժամանակին տրամադրումն ու համագործակցությունը։ Համագործակցության արդյունքում առաջիկայում, Շիրակի մարզի և Չինաստանի Խայնան նահանգի միջև կնքվելու է համագործակցության հուշագիր: «Նրանք պատրաստ են անմիջապես մի քանի ծրագրերով ներդրումներ իրականացնել՝ բազալտի և բազալտային թելերի արտադրության, բնակելիների շինարարության, ՏՏ ոլորտի զարգացման, տարբեր արտադրանքների, այդ թվում նաև սննդամթերքի արտահանման հետ կապված: Ներդրողները շատ ավելի են հետաքրքրված, քան մենք կարող էինք պատկերացնել»,- տեղեկացրեց հիմնադրամի գործադիր տնօրեն Վլադիմիր Սիմոնյանցը՝ վստահեցնելով, որ Գյումրիում հնարավոր է ոչ միայն բնակարանային շինարարություն, այլ նաև հնարավորության դեպքում նաև չվերթներ իրականացնել: «Արդեն բանակցություններ են տարվում մի քանի ավիաընկերությունների հետ՝ Չինաստան-Հայաստան չվերթ իրականացնելու մասին, իսկ ինչ վերաբերում է օդանավակայանի ընտրությանը, ապա դա քննարկվում է, թե որ օդանավակայանն ավելի հարմար կլինի չինական ավիաընկերությունների համար, եթե Գյումրու օդանավակայանը կհամապատասխանի չինական ավիաընկերությունների տեխնիկական նորմերին, ապա առաջնահերթությունը կտրվի նրան»,-նշեց Վլադիմիր Սիմոնյանցը: Ձեռնարկված քայլերի արդյունքում «Հայ-չինական հարաբերությունների տարածաշրջանային զարգացման հիմնադրամ»-ին տրված է հնարավորություն իրականացնելու ապրանքների արտահանում Շիրակի մարզից Չինաստան՝ Խայնան: Խայնանում նախատեսվում է բացել հայկական առևտրական պալատ։
Հանդիպման ընթացքում Եվրասիական կազմակերպության տնտեսական համագործակցության քարտուղարի տեղակալ Գե Չժիենի և «Հայ-չինական հարաբերությունների տարածաշրջանային զարգացման հիմնադրամի» գործադիր տնօրեն Վլադիմիր Սիմոնյանցի միջև ստորագրվեց համաձայնագիր երկու երկրների մասին պատմող ֆիլմերի ու հեռուստահաղորդումների փոխադարձ ցուցադրության մասին։
Արմենուհի Մխոյան